Ол 3 жасқа толғанда, оны әкесі тастап кетті. Ол дұрыстап қара таный алмайтын туабітті дислексик дертіне шалдыққан. Оның «Мықты хоккейші болсам» деген бала арманын жол апаты мәңгілікке жоқ етті. Оның жалғыз қызы тумай жатып шетінеп кетті. Көп ұзамай, әйелі де жол апатынан көз жұмды. Ең жақын досы есірткіден өлді. Жалғыз әпкесі айықпас қан ауруынан азап шегуде…
Бір басына осыншалық ауыртпалық түскеніне қарамастан, белгілі актер Киану Ривз қаріп-қасерге қолұшын созуын тоқтатар емес. «Көл жағасындағы үй» фильміне түсіп жүргенде ол бір костюмердің құрбысына жылап тұрып айтқан мұңын естіп қалады. Егер әлгі әйел тез арада 20 мың доллар төлемесе, банк оның үйін алып қоймақ екен. Киану Ривз сол күні ол әйелдің есеп-шотына керекті қаражатты аударып жібереді.
Ол 2010 жылы өз туған күнінде жергілікті қарапайым наубайханадан бір тал шырақ қондырылған тәтті бәліш сатып алып, жеп алады да, сол жерге келген барша жұртқа тегін кофе мен тәтті нандар сатып әпереді. Сөйтіп, Голливудтың өзге жұлдыздары өз туған күндерін аста-төк дастархан басына атақтыларды жинауды әдетке айналдырған тұста.., Киану Ривз өз туған күнін мейлінше қарабайыр түрде қарапайым адамдар арасында атап өтті…
«Матрица» картинасы үшін өте көп қаламақы алған ол, өз табысынан 50 миллион доллардан аса қаражатты фильм актерлеріне киім-кешек тіккен тігіншілерге бөліп берді. Кинода өзінің кейіпкерін қатар сомдаған барлық дублёр-актердің бас-басына бір-бір Харлей-Дэвидсон мотоциклін сыйлады.
Сондай-ақ, өзі түсетін картиналарда басқа әртістер де ойнап, жақсы табыс табулары үшін өзіне ұсынылған қаламақының 90%-нен бас тартып отырды.
1997 жылы папарацилер оны Лос-Анджелес көшелеріндегі панасыздармен бірге жүргенін көріп қалған. Алайда, әйгілі актердің қаңғыбастармен шүйіркелесіп отқан суретін баспасөзде жариялап, масқаралауға ешкім ниет етпепті.
Ол әлі күнге еш оққағарсыз қарапайым адам ретінде метромен еркін қатынайды, супермаркеттерде кезекте тұрады, тапқан бар табысын әлемнің түкпір-түкпіріндегі ауруханаларға аударады, көшедегі кедейлерге көмектеседі…
Голливуд жұлдыздары қос-қостан қымбат кемелер сатып алып, жеке ұшақпен жүргенде, ақшаны оңды-солды шашып, есірткіге елітіп жатқанда.., Киану Ривз қарапайым боп қалуды таңдады…
Қанат Ескендірдің фб парақшасынан алынды.
