Бүгін бір бойдақ үйленіп жатыр
Үйленіп жатыр түк білмей!
Үйге қайтуды үйреніп жатыр,
Жас келіншегін күттірмей!
Қосылған едi сағынып жүріп!
Араға түспе, сайтан-ай !
Мен құсап бүгін тағы бiр жігіт,
Қуанып отыр байқамай!
Көрсетер бəрiн екi ел маңдай!
Жазды өткізбеңдер күзді аңсап!
Жiгiт біткеннің бөтені бардай
Арудың бəрi қызғаншақ!
Олардың тілі-Тірі шаяны,
Шақса да шаршап келгенде!
Досым-ау, үйдiң ыдыс-аяғы,
Сылдырмақ емес сендерге!
Қадірін түсін қадірлегеннің!
Қожайынысың оттың сен!
Құлдырамайсың жаным дегеннің,
Синонимдерін көп бiлсең!
Үйлену оңай, үй болу қиын!
Деген мақал да Өтiрiк!
Келіншегіңмен кейде бір жиын,
Жасасаң болды отырып.
Бата алып жүрмін босағалардан,
Ат алып жүрмін сөзіммен
Той қызық болу асабалардан,
Бақытты болу өзіңнен!
Тегін кел дейді нар асабаға
Кейбiр тiл емес, тiкендер!
Тегін барар ем, бала-шағама
Тегін НАН берсе дүкендер!
Біледі жарың білмейтініңді
Білгеніңді айтып жүрерсің!
Мен неге тегін жүрмейтінімді
Бір жылға жетпей білерсің!
«Туған жерді таныстыру»
Ақтөбеде Шалқар деген ел жатыр,
Біздің елде туып-өскен ер батыр.
«Еңкейме деп дұшпаныңның алдында»
Қарттарымыз бала күннен берді ақыл.
Ер Тілеудің жүрегінің оты бар,
Ел қорғаған Дәрібай мен Көтібар.
Ер Есеттің батырлығы бір басқа,
Қас жауына жебе болып атылар.
Дана десең дана да бар Шалқарда,
Иманды елге не бермесін мәрт Алла!
Мөңке бидің нақылынан нәр алып,
Қазанғаптың күйін тыңда әр таңда.
Асан Ишан иманы бар, ары бар,
Тағыберген қамшыгерім тағы бар.
Алты Әлімнің ұранына айналған
Бақтыбайды туған елдің бағы бар.
Сары Батақ ел деп кешті қайғы мұң,
Боранбайдың Саршолағы — айбыным.
Мырзағұл да мырза болыс болыпты,
Халық үшін құрбан еткен байлығын.
Саналы ұрпақ Ідіріспен мақтанар,
Нағымдайын еңбек сүйсең бақ қонар.
Боз кілемде желбіреткен көк туды
Есенгелді есте мәңгі сақталар.
Мекен еткен ауызы бір алты Әлім,
Мен сендермен мақтанамын Шалқарым!
Бізден шыққан әр азамат лайықты,
Мол сеніммен тапсыруға хан тағын.
Дұшпан болсаң қастығыңды кел, ұқтыр,
Досым болсаң әзіл айтып жеңіп тұр.
Қорамдағы жалғыз қойым сойылсын,
Қонақ болсаң есігімді теуіп кір!!!
(Бірақ бізде барлық есік сыртқа қарай ашылады)
1
«Менің анкетам»
Аты-жөнің?
— Алагөзов Қайнармын.
Әкең бар ма?
— Бар еді ғой, жайдарлым.
Қазір қайда?
— Қара жерге тапсырдық.
Қайрылмасын түсінген соң қайғы алдым.
Анаң бар ма?
— Бар, сенерім сол менің.
Алладан не тілемейсің?
— Өлгенін.
Не тілейсің?
— Пенде бар ма мәңгілік,
Көргеніндей қылсын енді көрмегін.
Кім еді атаң?
— Көкен шалдың ұлымын.
Шегірткеден көп Шектінің бірімін.
Бауырларың?
— Отбасында үшеуміз.
Бір ағам бар, мен ортаншы, бір інім.
Үйлендің бе?
— Хас сұлуға үйлендім.
Әйеліңді сүйесің бе?
— Сүйгенмін.
Алғашқыда жүрек дүрсіл қағатын.
Ал, қазір ше?
— Сәл де болса үйрендім.
Қанша адаммен сыйласасың?
— Жетеді.
Достарың кім?
— Аян, Құрал екеуі.
Олар кімдер?
— Сазгер бойдақ біреуі,
Біреуі ақын он жетіден некелі.
Ет жеймісің?
— Қазақпын ғой, шырағым.
Өз ұлтымның ұлы болу ұраным.
Қазақ саған не береді, ұланым?
— Біртүрлі екен сұрағың.
Сен қазаққа не бересің?
— Жанымды.
Арым үшін, мен сөзімде тұрамын.
Қайнар АЛАГӨЗОВ.
